Il-Prim Ministru Robert Abela kellu laqgħa bilaterali mar-Re tal-Ġordan Abdullah II fil-marġini tas-Summit tal-MED9 f’Ċipru. Fil-laqgħa ġew diskussi diversi temi fosthom il-paċi u s-sigurtà fil-Lvant Nofsani. 

Il-Prim Ministru saħaq li Malta għandha relazzjoni b’saħħitha mal-Ġordan u tenna li pajjiżna huwa grat għall-irwol li l-Ġordan qed jieħu biex jiffaċilita t-taħditiet għad-deskalazzjoni tat-tensjonijiet fil-Lvant Nofsani. Huwa tenna s-sejħa ta’ Malta għall-waqfien immedjat mill-ġlied fil-Libanu u f’Gaża.

Dr Abela qal li Malta taqbel li l-Unjoni Ewropea tappoġġja bi sħiħ lill-Ġordan, hekk kif dan il-pajjiż qed joffri kenn lil numru ta’ refuġjati li telqu mill-pajjiżi li fihom għaddej il-ġlied. Huwa temm jgħid li jħares ’il quddiem għal aktar kollaborazzjoni mal-Ġordan fuq temi reġjonali.

Jakkumpanja lill-Prim Ministru Abela għat-taħditiet bilaterali kien hemm id-Deputat tal-Gvern Carmelo Abela.