Month: October 2024

Fl-inawgurazzjoni tal-ewwel koperattiva tat-tonn bejn Malta u ċ-Ċina, il-Prim Ministru Robert Abela nnota s-sens ta’ innovazzjoni fis-settur tal-akwakultura biex in-negozju Malti jimraħ fi swieq kbar, fosthom fiċ-Ċina.

Quddiem realtà li pajjiżna qed ikompli jesporta tonn ta’ kwalità, il-Prim Ministru saħaq fuq l-ogħla standards. Fil-fatt, l-ewwel konsenja ta’ tonn mkabbar f’Malta għaċ-Ċina ġiet mgħoddija f’Settembru ta’ din is-sena. Dan anke wara ħidma kbira sabiex jiġi assigurat li l-prodott Malti jkun konformi ma’ standards Ewropej u internazzjonali flimkien ma’ regoli ambjentali stabbiliti.

Dr Abela nnota wkoll kif tnieda wkoll proċess simili ta’ esportazzjoni b’rabta ma’ prodotti oħra relatati mal-ħut. Dan jorbot perfettament mal-impenn tal-Gvern li jippromwovi ekonomija ċirkolari u jnaqqas kemm jista’ il-ħela tal-ikel. Hawn fil-fatt Dr Abela aċċenna dwar l-importanza ta’ operat sostenibbli li l-Gvern jappoġġja bi sħiħ.

Il-Prim Ministru Robert Abela awgura li din is-sħubija bejn pajjiżna u ċ-Ċina, irrapreżentata minn Malta Fish Farming u l-grupp Shandong Marine tkun suċċess. Il-Prim Ministru spjega kif din is-sħubija hi eżempju ta’ kif bl-innovazzjoni nistgħu nkabbru l-kummerċ u l-koperazzjoni bejn pajjiżi differenti.

“Din il-pjattaforma ta’ koperazzjoni tissimbolizza mhux biss kollaborazzjoni ekonomika imma s-saħħa tar-rabtiet bejn Malta u ċ-Ċina. Flimkien inħarsu ’l quddiem għal futur mimli opportunitajiet, prosperità u aktar kollaborazzjonijiet,” temm jgħid il-Prim Ministru.

“Grazzi għar-riforma li saret, illum il-ġurnata hawn inqas minn kwart tal-operaturi tat-Temping Agencies kollha qabel ġew irregolati, li qed joperaw.”

Sostna dan il-Prim Ministru Robert Abela waqt laqgħa oħra ta’ konsultazzjoni ta’ qabel il-Budget mal-UĦM Voice of the Workers.

Laqgħa ta’ konsultazzjoni li fiha ddominat diskussjoni dwar id-drittijiet tal-ħaddiema f’pajjiżna u kif dawn għandhom jibqgħu jiġu mtejba mhux biss fil-Budget li ġej iżda anke lil hinn minn hekk.

Fid-diskussjonijiet il-Prim Ministru Robert Abela sostna kif il-Gvern qed ikun proattiv u jindirizza dan fejn hemm bżonn u mhux jistenna l-Budget għas-sena d-dieħla jitħabbar.

Kien hawn li semma r-riforma li rregolat lit-Temping Agencies. Riforma li wasslet biex illum hawn inqas minn kwart tan-numru tal-operaturi tat-Temping Agencies oriġinali joperaw u li qed iwettqu xogħolhom b’konformità ma’ linji gwida u proċeduri li jħarsu r-realtajiet tas-swieq tax-xogħol differenti f’pajjiżna.

“Rajna wkoll li permezz ta’ reviżjonijiet apposta nindirizzaw over-supply ta’ ħaddiema f’ċerti setturi parikolari. Insemmi dawk tal-y-plates u l-food couriers biex fl-istess waqt nipproteġu wkoll il-ħobża ta’ kuljum tal-ħaddiema li ilhom jaħdmu f’dawn is-setturi għaliex over-supply fl-aħħar mill-aħħar jista’ jaffettwa b’mod negattiv ħaddiema li jkunu ilhom stabbiliti f’dan is-settur filwaqt li jinħoloq lok għal abbuż,” sostna wkoll Dr Abela.

Il-Prim Ministru fakkar kif il-Gvern baqa’ jwieżen lill-ħaddiema f’pajjiżna permezz tal-ftehim storiku li wassal għal żieda sostanzjali fil-paga minima, mhux biss issa iżda anke għas-snin li ġejjin. Dan flimkien mas-serħan il-moħħ permezz tas-sussidji minħabba l-inflazzjoni fil-prezzijiet tal-enerġija li assiguraw li min iħaddem jibqa’ għaddej bl-operat tiegħu b’mod normali u l-piż ma jintefax fuq il-ħaddiem.

“Ejja niddiskutu, ejja nħabbtu l-ideat sabiex il-ħaddiema tagħna jibqgħu fuq quddiem tal-prijoritajiet ta’ dan il-pajjiż,” temm jgħid il-Prim Ministru.

Jakkumpanjaw lill-Prim Ministru kien hemm il-Ministri Michael Falzon, Byron Camilleri u Clyde Caruana, is-Segretarju Parlamentari Andy Ellul, il-Membru Parlamentari Katya De Giovanni u l-Kap tas-Segretarjat fl-Uffiċċju tal-Prim Ministru Mark Mallia.

Is-settur turistiku mhuwiex biss żieda fin-numru ta’ turisti, iżda huwa qasam li jwassal għal progress soċjali u li bih inkomplu nixprunaw l-iżvilupp sostenibbli li huwa ta’ ġid għal pajjiżna. Hekk saħaq il-Prim Ministru Robert Abela f’indirizz li għamel waqt it-tqegħid tal-ewwel ġebla tal-proġett tal-lukanda Hard Rock Hotel Malta flimkien ma’ kumpless tal-ospitalità f’San Ġiljan. Waqt il-bidu ta’ investiment privat ta’ €300 miljun, il-Prim Ministru Robert Abela tkellem dwar kif l-investiment ta’ kwalità jrid iwassal biex inkomplu ngħollu l-prodott turistiku li joffri pajjiżna.

Dr Abela spjega li pajjiżna rkupra b’mod tajjeb mill-pandemija wara impatt dirett fuq it-turiżmu u llum qed nitkellmu fuq dħul iġġenerat minn din l-industrija li qed jiġi stmat li sal-aħħar tas-sena jlaħħaq it-€3 biljun. Saħaq iżda li mhux iċ-ċifri biss li jgħoddu, iżda l-importanza tal-kwalità fit-turiżmu fejn b’inqas wasliet, pajjiżna xorta jista’ jiġġenera valur b’saħħtu. Il-Prim Ministru qal li investiment privati jgħinu favur direzzjoni b’enfasi fuq il-kwalità u l-gvern jappoġġja dak li fih jirrenja r-rieda t-tajba.

Il-Prim Ministru Robert Abela spjega li r-riżultati minn swieq differenti huma inkoraġġanti, fosthom mill-Istati Uniti u mir-Renju Unit, u qal li pajjiżna qed jimxi lejn direzzjoni biex jattira turisti li jfittxu esperjenza unika. “Fiduċjużi li Malta u Għawdex kapaċi jagħtu iżjed prodott ta’ kwalità lit-turisti,” qal il-Prim Ministru, hu u jinnota kif biex nimxu lejn kwalità rridu nassiguraw li nibqgħu nattiraw lejna investimenti ta’ valur u li jagħtu isem lejn dak li joffri pajjiżna.

Qal li l-appoġġ tal-gvern se jibqa’ permezz ta’ investiment fl-infrastruttura u tkabbir sostenibbli li jkompli jinjetta saħħa fit-turiżmu u fil-qasam tal-ospitalità anke billi jogħlew l-istandards. Il-Prim Ministru spjega li hekk inkomplu nagħtu futur lil dan il-qasam li dejjem kien importanti għal pajjiżna u nieħdu mit-turiżmu l-aqwa ġid għall-Maltin u l-Għawdxin.

Meta ltaqa’ mal-istudenti u l-għaqdiet studenteski fl-Università ta’ Malta f’Tal-Qroqq waqt Freshers’ Week, il-Prim Ministru Robert Abela saħaq li l-attiviżmu taż-żgħażagħ huwa importanti biex inkomplu nġeddu lil pajjiżna u nġibu bidliet pożittivi.

Meta l-Prim Ministru Robert Abela flimkien ma’ martu Dr Lydia Abela u l-Ministru għall-Edukazzjoni, iż-Żgħażagħ, ir-Riżorsi u l-Innovazzjoni Clifton Grima kienu qed jiltaqgħu mal-istudenti fosthom fuq l-istands armati tal-għaqdiet, il-Prim Ministru tkellem mal-istudenti dwar il-ħsibijiet favur pajjiż li jkompli joffri futur sabiħ b’karrieri ta’ kwalità għaż-żgħażagħ u għall-familji tagħhom.

Il-Prim Ministru spjega li l-Gvern se jkompli jinvesti fl-istudenti u jagħti direzzjoni biex aktar studenti jistudjaw f’korsijiet għal setturi innovattivi biex iż-żgħażagħ jibqgħu jaħtfu l-aqwa opportunitajiet li qed jinħolqu f’pajjiżna fosthom green jobs li jagħtu valur miżjud fl-ekonomija.

Hawn semma wkoll iż-żidiet fl-istipendji u t-tisħiħ addizzjonali għal dawk l-istudenti li jistudjaw f’korsijiet partikolari.

Dr Abela nnota wkoll li l-attiviżmu taż-żgħażagħ ikompli jimbotta ħsieb kritiku li hu importanti u rrimarka li rebħet ir-raġuni waqt Freshers’ Week fl-Università biex b’hekk l-opinjonijiet espressi b’rispett minn kulħadd, irrispettivament mis-suġġett, ma jkunux maħnuqa.

Il-Prim Ministru Robert Abela awgura lill-istudenti kollha għal sena oħra mimlija impenn u affarijiet pożittivi fil-vjaġġ edukattiv tagħhom filwaqt li rringrazzja wkoll lill-ħaddiema kollha fl-Università, fosthom l-akkademiċi.

Fl-Università għadha kemm bdiet sena akkademika ġdida li laqgħet 5,000 student ġdid fejn mat-terz minnhom qed jagħmlu kors f’livell ta’ postgraduate. 

Dan fl-istess waqt li sar investiment fir-riżors uman tal-Università permezz ta’ ftehim kollettiv iffirmat favur kundizzjonijiet ta’ xogħol imtejba għall-ħaddiema tal-amministrazzjoni, tekniċi u industrijali tal-Università ta’ Malta.

Il-Prim Ministru Robert Abela ħabbar li l-gvern fiż-żmien li ġej se jkun dipost li jitkellem dwar riforma favur standards ogħla fis-settur turistiku.

Dr Abela qal dan hekk kif kien qed jindirizza laqgħa oħra ta’ konsultazzjoni ta’ qabel il-Budget, din id-darba mal-Assoċċjazzjoni Maltija tal-Lukandi u r-Ristoranti, l-MHRA.

Fil-fatt, il-Prim Ministru sostna dan hekk kif innota anke l-prinċipju tas-sostenibbiltà li wasslet l-istess MHRA fid-dokument tagħha bi proposti għall-Budget għas-sena d-dieħla.

Il-Prim Ministru tkellem dwar kif b’hekk, din il-konverġenza se sservi tajjeb bħala bażi soda għal diskussjonijiet importanti li issa għandhom iseħħu sabiex is-settur turistiku f’pajjiżna jkompli jiġi msaħħaħ b’mod għaqli fi sfond ta’ prijoritajiet ġodda f’pajjiżna.

Fil-fatt, wara żjara li anke għamel ġewwa l-lukanda ewlenija Corinthia f’Ħ’Attard, fejn il-Prim Ministru ġie spjegat investiment sostanzjali ta’ riġenerazzjoni li sar f’partijiet minnha, fosthom f’Villa Corinthia, id-daħla tal-lukanda u anke numru ta’ kmamar, waqt il-laqgħa mal-MHRA Dr Abela rrimarka dwar l-importanza ta’ dan l-impenn favur titjib kontinwu fis-settur turistiku inġenerali b’enfasi lejn il-kwalità u mhux sempliċiment in-numru ta’ wasliet.

Il-Prim Ministru nnota wkoll li n-nefqa mit-turisti hi pożittiva ħafna fl-aħħar sena, b’din huwa mistenni li tibqa’ tiġi sostnuta anke frott strateġija b’saħħitha mill-Awtorità Maltija għat-Turiżmu. Qal li mbagħad kien hemm żviluppi notevoli fis-settur kontra l-istaġjonalità, b’wasliet ta’ turisti mhux biss fl-eqqel tas-settur. Dr Abela tenna l-impenn tal-gvern li issa jkun hemm aktar ħidma sabiex ikun attirat lejn pajjiżna turiżmu ta’ kwalità li filwaqt li jħalli introjtu b’saħħtu, jaqdi aħjar ir-realtajiet u l-bżonnijiet ta’ pajjiżna.

“Filwaqt li rridu nibqgħu nikkonsolidaw is-suċċess li ksibna f’dan is-settur issa ejja nħarsu ’l quddiem flimkien biex nagħmluh wieħed aktar sostenibbli u li jkollu standards ogħla. Diġà bdejna, għamilna dan permezz tal-iskills pass però rridu nkomplu. L-iskills pass kienet riforma li ħdimniha flimkien. Żgur ma kinitx triq faċli imma wasalna bid-djalogu. Hemm ħafna iżjed xi jsir. Miftuħin għad-diskussjoni, impenjati li nieħdu d-deċiżjonijiet u nimplimentaw,” temm jgħid il-Prim Ministru.

Jakkumpanjaw lill-Prim Ministru għal din il-laqgħa ta’ konsultazzjoni kien hemm il-Ministri Owen Bonnici, Anton Refalo, Byron Camilleri, Clayton Bartolo, Clyde Caruana u Chris Bonett, is-Segretarji Parlamentari Andy Ellul, Alicia Bugeja Said  u Glenn Bedingfield u l-Kap tas-Segretarjat fi ħdan l-Uffiċċju tal-Prim Ministru Mark Mallia.