Month: March 2026

Il-Prim Ministru Robert Abela kellu laqgħa mal-Prim Ministru tal-Lussemburgu, Luc Frieden, fil-Lussemburgu.

Matul din il-laqgħa, ġew diskussi r-relazzjonijiet bejn iż-żewġ pajjiżi kif ukoll diversi oqsma ta’ interess komuni, fosthom il-kummerċ, l-investiment u l-edukazzjoni u l-kultura.

Il-Prim Ministru Abela enfasizza l-importanza li Malta tkompli ssaħħaħ ir-relazzjonijiet tagħha mal-Lussemburgu filwaqt li jinħolqu aktar opportunitajiet għal negozji u investiment bejn iż-żewġ pajjiżi. Huwa rrimarka wkoll il-potenzjal għal aktar kollaborazzjoni f’oqsma bħas-servizzi finanzjarji, it-teknoloġija u s-sostenibbiltà.

Iż-żewġ Prim Ministri ddiskutew ukoll temi internazzjonali u Ewropej, u qablu fuq il-ħtieġa li tkompli tissaħħaħ il-kooperazzjoni bejn il-pajjiżi membri tal-Unjoni Ewropea.

Dwar is-sitwazzjoni fil-Lvant Nofsani, iż-żewġ naħat saħqu fuq il-ħtieġa ta’ de-eskalazzjoni immedjata u r-rispett sħiħ tal-liġi internazzjonali. Huma enfasizzaw ukoll l-importanza ta’ soluzzjoni sostenibbli, ibbażata fuq djalogu. 

Il-Prim Ministru Robert Abela tkellem dwar l-impenn ta’ Malta favur relazzjonijiet b’saħħithom ma’ pajjiżi msieħba, filwaqt li sostna li d-djalogu kontinwu huwa kruċjali biex jiġu indirizzati sfidi komuni. 

Din il-laqgħa saret waqt żjara tal-Prim Ministru fil-Lussemburgu, fejn aktar tard se jattendi għall-partita tat-tim nazzjonali Malti tal-futbol kontra l-Lussemburgu.

Il-Prim Ministru Robert Abela indirizza attività kommemorattiva fl-okkażjoni tat-30 anniversarju ta’ Thermoplastics Ltd f’Malta, fejn sellem il-ħidma, il-viżjoni u r-reżiljenza li wasslu biex din il-kumpanija ssir storja ta’ suċċess fil-qasam tal-manifattura f’pajjiżna.

Fl-indirizz tiegħu, il-Prim Ministru rrimarka li s-settur tal-manifattura huwa wieħed li joħloq karrieri u opportunitajiet għal ħafna ħaddiema Maltin u Għawdxin.

Dr Abela nnota li pajjiżna laħaq tragward importanti meta rreġistra l-ogħla rata ta’ impjiegi fl-Unjoni Ewropea, frott deċiżjonijiet strateġiċi li ttieħdu tul dawn l-aħħar snin. Huwa żied jgħid li l-manifattura baqgħet toħloq impjiegi, baqgħet kompetittiva u mistenni li tkompli tgħolli l-livell tal-kwalità. Fl-istess waqt huwa ta ġieħ lil dawk kollha li jaħdmu bla heda biex jiġġeneraw suċċess f’settur tant importanti għall-ekonomija Maltija.

Il-Prim Ministru nnota kif din il-kumpanija espandiet l-operat tagħha lill hinn minn xtutna, fir-reġjun tal-Mediterran u rnexxielha tibni netwerks kummerċjali ma’ kumpaniji kbar internazzjonali. Qal li dan juri biċ-ċar il-potenzjal tal-intrapriża Maltija meta tkun imsaħħa b’viżjoni, bl-investiment neċessarju u  bi tmexxija serja.

Dr Abela rrefera wkoll għall-Viżjoni Malta 2050, viżjoni li tħares lejn il-manifattura bħala pilastru ta’ eċċellenza biex pajjiżna jibqa’ jipproduċi u jesporta prodotti ta’ kwalità magħmula fil-fabbriki tagħna, filwaqt li jsaħħaħ il-pożizzjoni globali ta’ pajjiżna. Huwa żied jgħid li  din il-viżjoni hija possibbli għaliex Malta għandha ekonomija b’saħħitha li tagħti ċ-ċertezza u l-istabbiltà meħtieġa biex in-negozji jkomplu jinvestu u jespandu.

Huwa tenna li ċ-ċertifikati pożittivi li l-ekonomija Maltija qed tibqa’ tirċievi minn aġenziji internazzjonali tal-kreditu u minn istituzzjonijiet bħall-Kummissjoni Ewropea u l-Fond Monetarju Internazzjonali jkomplu jsaħħu l-kapaċità tal-Gvern li joffri sostenn konkret lin-negozji, b’mod partikolari permezz tas-sussidju fl-elettriku.

Il-Prim Ministru sostna li, waqt li fabbriki madwar l-Ewropa qed jiffaċċjaw inċertezza kbira u f’ċerti każijiet qed jintalbu jnaqqsu jew iwaqqfu l-operat tagħhom f’ċerti ħinijiet, f’Malta l-Gvern se jibqa’ jżomm il-prezzijiet tal-enerġija stabbli u jagħti s-serħan il-moħħ lin-negozji biex ikomplu jikbru u jespandu. Qal li Malta hija l-uniku pajjiż Ewropew li żamm stabbli l-prezzijiet tal-enerġija matul dawn l-aħħar erba’ snin minkejja l-isfidi internazzjonali, b’investiment li laħaq il-biljun ewro biex isostni lill-familji u lin-negozji.

Fl-istess waqt, il-Prim Ministru Abela qal li l-Gvern se jkompli jinċentiva ż-żewġ trasformazzjonijiet ewlenin li jridu jkomplu jmexxu ’l quddiem l-industrija, dik diġitali u dik ambjentali. Dr Abela rrimarka li Thermoplastics diġà qed turi impenn qawwi lejn is-sostenibbiltà, fosthom permezz tal-użu ta’ materjal tal-plastik riċiklat. Huwa spjega li l-qalba ambjentali mhijiex biss sfida, iżda opportunità. Fl-istess waqt il-qalba diġitali hija wkoll ċans ieħor biex il-manifattura tkompli tevolvi. Qal li għalhekk huwa essenzjali l-investiment fil-ħiliet u fl-aqwa teknoloġija, mhux biex it-teknoloġija tieħu post il-ħaddiema, iżda biex tikkumplimenthom.

Il-Prim Ministru Abela temm billi rringrazzja lill-management u lill-ħaddiema kollha ta’ Thermoplastics tas-sehem tagħhom matul dawn it-30 sena, filwaqt li assigura lill-kumpanija li f’Malta se tibqa’ ssib stabbiltà u serħan il-moħħ biex tkompli miexja ’l quddiem.

Fl-okkażjoni tkellem ukoll il-Ministru għall-Ekonomija, l-Intrapriża u Proġetti Strateġiċi Silvio Schembri li saħaq li l-investiment fit-teknoloġiji avvanzati bħall-awtomazzjoni u t-3D printing juri li Thermoplastics qed tħares ’il quddiem u tinvesti fil-futur. “Dan huwa eżatt il-mudell ta’ negozju li rridu naraw f’pajjiżna, mudell li jimxi id f’id mal-Viżjoni Malta 2050. B’dan il-mod, qed nassiguraw li l-innovazzjoni u s-sostenibbiltà jkunu l-elementi ewlenin għal ekonomija li tkompli toħloq impjiegi ta’ kwalità u valur miżjud,” qal il-Ministru Schembri. Preżenti kien hemm ukoll il-Ministru għall-Ambjent, l-Enerġija u l-Indafa Pubblika Miriam Dalli.

Thermoplastics Ltd  timpjega aktar minn 250 persuna f’Malta u fit-Tuneżija, u tipprovdi prodotti lill-klijenti kemm lokali kif ukoll barranin fis-setturi tal-ġugarelli, tal-karozzi, tal-ismart technologies, kif ukoll tal-kostruzzjoni.

Il-Prim Ministru Robert Abela, akkumpanjat mill-Ministru għall-Inklużjoni u l-Volontarjat Julia Farrugia, żar il-Fondazzjoni Karl Vella, organizzazzjoni volontarja li toffri sapportpsikoterapewtiku lil familji u individwi li jkunu għaddejjin minn mard jew minn telfa ta’ persuna għażiża.

Matul iż-żjara, il-Prim Ministru dar il-binja li minnha tiffunzjona din il-Fondazzjoni, fejn iltaqa’ mat-tmexxija u mal-membri tal-istaff. Hawnhekk ġie  spjegat aktar dwar il-viżjoni futura tal-Fondazzjoni li tinkludi, fost inizjattivi oħra, l-iżvilupp ta’ servizzi speċjalizzati għall-kura fid-dar.

Il-Fondazzjoni Karl Vella bħalissa tappoġġja aktar minn 500 persuna, inkluż tfal u adulti, permezz ta’ servizzi mogħtija bla ħlas minn professjonisti kwalifikati fil-qasam tas-saħħamentali. Il-missjoni tal-Fondazzjoni hija li toħloq ambjent ta’ wens u sapport għal familji li jkunu għaddejjin minn mumenti diffiċli f’ħajjithom.

Waqt iż-żjara, il-Prim Ministru u l-Ministru Farrugia tkellmu ma’ persuni li bbenefikaw mis-servizzi tal-Fondazzjoni, fejn setgħu jifhmu aħjar l-impatt pożittiv li l-Fondazzjoni Karl Vella qed tħalli fil-ħajja tat-tfal, iż-żgħażagħ, l-adulti u l-familji. 

Din il-Fondazzjoni toffri diversi programmi li jappoġġjaw tfal u żgħażagħ ta’ bejn il-5 snin u s-17-il sena li jkunu qed isofru minn mard jew minn telfa ta’ persuni qrib tagħhom, kif ukoll inizjattivi immirati għal dawk li jkunu għaddejjin minn kura għal mard serju, mhux biss f’pajjiżna imma anke barra minn xtutna. Il-Fondazzjoni toffri wkoll servizzi għall-adulti permezz tal-programmi Because You Matter u Life Beyond Loss. Minbarra dan, il-Fondazzjoni tipprovdi terapija individwali għal persuni ta’ kull età, u tinvesti fit-taħriġ kontinwu sabiex aktar professjonisti ġenituri u ħaddiema fis-setturi edukattivi u psikosoċjali jkunu mgħammra biex jindirizzaw dawn is-sitwazzjonijiet.

Il-Prim Ministru faħħar il-ħidma tal-Fondazzjoni Karl Vella u rrikonoxxa l-valur kbir tas-servizz li qed toffri lill-familji Maltin u Għawdxin. Huwa sostna li organizzazzjonijiet bħal dawn huma eżempju ċar ta’ solidarjetà, empatija u impenn lejn il-ġid tal-persuna, speċjalment fi żminijiet diffiċli. Dr Abela rringrazzja lit-tmexxija, lill-professjonisti u lill-voluntiera għad-dedikazzjoni tagħhom, hekk kif il-ħidma tagħhom qed tagħmel differenza reali u konkreta fil-ħajja ta’ ħafna individwi u familji.

Il-Gvern jibqa’ impenjat li jappoġġja u jħeġġeġ inizjattivi li jqiegħdu lill-bniedem fiċ-ċentru tal-ħidma tagħhom u li jkomplu jsaħħu l-appoġġ fis-saħħa mentali, fis-servizzi soċjali u fil-kura b’dinjità għal kull min għandu bżonnha.

Fil-Berġa ta’ Kastilja, waqt laqgħa mal-Viċi President Eżekuttiv tal-Kummissjoni Ewropea responsabbli mill-Koeżjoni u r-Riformi, Raffaele Fitto, il-Prim Ministru Robert Abela sostna li għal Malta, il-politika ta’ koeżjoni tal-Unjoni Ewropea hija essenzjali biex tappoġġja investiment fl-infrastruttura, fl-iżvilupp tal-ħiliet, fid-diversifikazzjoni ekonomika u fl-inklużjoni soċjali. Dan filwaqt li tgħin biex issaħħaħ ir-reżiljenza ta’ pajjiżna quddiem sfidi ekonomiċi u ġeopolitiċi li kulma jmur dejjem qed jikbru.

Fl-istess ħin, il-Prim Ministru enfasizza li Stati Membri żgħar, gżejjer u fil-periferija tal-kontinent Ewropew, bħalma hu pajjiżna, iħaddnu realtà partikolari minħabba numru ta’ sfidi li dawn jiffaċċjaw, inkluż dik tal-insularità, il-konnettività, is-sigurtà tal-ilma u tal-enerġija. Fl-isfond ta’ dan kollu l-Prim Ministru saħaq fuq il-ħtieġa li waqt id-diskussjonijiet dwar il-qafas finanzjarju tal-UE għal wara l-2027 jibqa’ jiġi enfasizzat il-bżonn ta’ qafas aktar flessibbli u proporzjonat, biex b’hekk il-politika ta’ koeżjoni tibqa’ tissarraf f’riżultati konkreti u ta’ valur għaċ-ċittadini kollha.

Preżenti għal-laqgħa kien hemm ukoll id-Deputat Prim Ministru u Ministru għall-Affarijiet Barranin u t-Turiżmu Ian Borg, il-Ministru għall-Fondi Ewropej u l-Implimentazzjoni tal-Programm Elettorali Stefan Zrinzo Azzopardi, il-Kap tas-Segretarjat tal-Uffiċċju tal-Prim Ministru, il-Kurunell Mark Mallia, il-Konsulent tal-Prim Ministru fuq l-Affarijiet Ewropej, Leandro Borg u s-Segretarju Permanenti għall-Fondi Ewropej, Jonathan Vassallo.

• Imwettqa 82% tal-miżuri tal-manifest
• Fuq livell ekonomiku, Malta kompliet tikseb riżultati eċċezzjonali
• Malta kienet l-uniku pajjiż Ewropew li ma għolliex il-prezz tal-elettriku, tal-fjuwils u tal-gass, b’investiment ta’ kważi biljun ewro
• Mill-2022 sal-ewwel kwart tal-2026, il-Gvern investa aktar minn sitt biljun ewro f’investiment soċjali

Erba’ snin wara li ngħata l-akbar mandat elettorali fl-istorja ta’ Malta sovrana, il-Gvern immexxi mill-Prim Ministru Robert Abela kompla jwettaq il-miżuri li ressaq quddiem il-poplu permezz tal-manifest Malta Flimkien, b’riżultati konkreti li qed jinħassu fil-ħajja ta’ kuljum tal-familji Maltin u Għawdxin.

F’konferenza tal-aħbarijiet fil-kumpless sportiv tal-Marsa, proġett li sar f’din il-leġislatura, il-Prim Ministru Robert Abela ta rendikont tal-ħidma. Saħaq li minkejja sfidi internazzjonali l-Gvern baqa’ jżomm sod mal-wegħdiet li ta u qed iwettaqhom. Huwa żied jgħid li sal-lum, 82% tal-proposti tal-manifest Malta Flimkien ġew imwettqa.

Tul dawn l-erba’ snin, kompliet tingħata prijorità assoluta lill-familja. Dan sar permezz ta’ żidiet sostanzjali fiċ-Children’s Allowance, tnaqqis fit-taxxa għall-ħaddiema u l-ġenituri li qabżu sew dak li kien imwiegħed, kif ukoll permezz ta’ politika soċjali progressiva li tejbet il-kwalità tal-ħajja tan-nies.

Dr Abela semma kif tul dawn l-erba’ snin sar ukoll progress sinifikanti f’oqsma sensittivi u essenzjali għall-ġid tal-familji, fosthom permezz tal-emendi fil-liġi tal-IVF biex aktar persuni jingħataw l-opportunità jsiru ġenituri f’pajjiżhom stess, it-tisħiħ tas-servizzi f’Għawdex, ir-riforma fil-Qorti tal-Familja, il-ftehimiet kollettivi li tejbu l-pagi u l-kundizzjonijiet tax-xogħol ta’ eluf ta’ ħaddiema, fost ħafna miżuri oħra. 

Il-Prim Ministru nnota wkoll kif fuq livell ekonomiku, Malta kompliet tikseb riżultati eċċezzjonali. Għall-ewwel darba, il-ġid nazzjonali qabeż il-medja taż-Żona Ewro, filwaqt li pajjiżna issa jinsab fost l-aqwa għaxar ekonomiji fl-Unjoni Ewropea. Malta saret ukoll il-pajjiż bl-anqas rata ta’ qgħad fl-UE u kisbet l-aqwa rata ta’ impjiegi fl-istorja. Dawn huma ċertifikati ċari ta’ ekonomija b’saħħitha li qed taħdem għan-nies.

Din is-saħħa ekonomika ppermettiet lill-Gvern ikompli jkun it-tarka tal-familji u n-negozji. Fl-aħħar erba’ snin, Malta kienet l-uniku pajjiż Ewropew li ma għolliex il-prezz tal-elettriku, tal-fjuwils u tal-gass, b’investiment ta’ kważi biljun ewro biex jinżammu l-prezzijiet stabbli. Barra minn hekk, il-Gvern għandu mal-kwart ta’ biljun ewro allokati biex ikompli joffri serħan il-moħħ u stabbiltà quddiem l-inċertezza internazzjonali.

Dr Abela qal li mill-2022 sal-ewwel kwart tal-2026, il-Gvern investa aktar minn sitt biljun ewro f’investiment soċjali, filwaqt li kompla jinvesti b’mod qawwi fl-infrastruttura, fis-saħħa, fl-edukazzjoni u fl-iżvilupp sostenibbli tal-gżira Għawdxija.

Fl-istess ħin, il-Gvern qed iħares ’il quddiem b’viżjoni ċara għal pajjiżna. Bil-Viżjoni Malta 2050, il-prijorità issa hija li jinbnew ħiliet ġodda għall-futur. Dan jidher ukoll fl-akbar Budget fl-istorja ta’ pajjiżna, li jinkludi investiment ta’ €100 miljun fl-AI u d-diġitalizzazzjoni, €40 miljun għan-negozji biex itejbu l-pagi, il-ħiliet u jimmodernizzaw l-operat tagħhom, kif ukoll l-akbar pakketti ta’ għajnuna favur l-għalliema, il-letturi, l-istudenti u l-ġenituri.

Dr Abela saħaq li x-xogħol tal-Gvern se jkompli b’pass qawwi fix-xhur li ġejjin, b’numru ta’ proġetti u riformi li ser ikomplu jwettqu l-manifest elettorali, u  li jkomplu jibnu pajjiż aħjar. Fost dawn hemm il-bidu tax-xogħol fuq il-proġett ta’ Project Green f’Bormla, il-proġett tal-Organic Waste Renewable Energy Generation Plant, skejjel ġodda f’diversi lokalitajiet f’Malta u Għawdex, tliet distribution centres ġodda tal-elettriku, strateġija dwar il-mard rari, infrastruttura ġdida għat-trasport bil-baħar, skwadra ġdida tal-Pulizija f’Paceville, stazzjon tat-tifi tan-nar ġdida fil-Magħtab, skema ġdida ta’ enerġija rinnovabbli għall-familji, il-proġett tal-Qorti ta’Għawdex, kif ukoll riformi importanti fil-qasam tal-ġustizzja u n-negozju, fost l-oħrajn.

Il-Prim Ministru Robert Abela sostna li dak li nkiseb s’issa huwa biss il-bidu. Dan il-Gvern mhux biss huwa garanzija li l-kisbiet tal-lum se jibqgħu tal-poplu għada u pitgħada, iżda huwa wkoll il-garanzija tal-aqwa futur li jistgħu jaspiraw għalih il-familji Maltin u Għawdxin.

Id-Deputat Prim Ministru u Ministru għall-Affarijiet Barranin u t-Turiżmu Ian Borg elenka erba’ prioritajiet ewlenin li kiseb dan il-Gvern f’dawn l-erba’ snin – Malta bi stabbiltà għall-familji u n-negozji, Malta reżiljenti għall-isfidi internazzjonali, Malta b’vuċi globali għall-paċi u d-djalogu u Malta li kompliet issaħħaħ ir-reputazzjoni u tikseb fiduċja – għanijiet li jkomplu jibnu fuq dak li stinka għalih l-moviment progressiv u għaqli tal-poplu Malti f’dawn l-aħħar 13-il sena.

“Taħt it-tmexxija tal-Prim Ministru Robert Abela, dan il-Gvern se jkompli jħares ’il quddiem, se nibqgħu saqajna mal-art, u se nibqgħu nistinkaw flimkien, bħala poplu wieħed, biex dak li ksibna fl-aħħar snin insarrfuh f’ħajja aħjar għall-familji tagħna, f’ekonomija b’rabtiet internazzjonali aktar diversifikati, f’opportunitajiet akbar għal uliedna, u f’Malta aktar reżiljenti – Malta mħejjija għall-isfidi tal-lum u tal-ġejjieni,” żied jgħid Dr Borg.

Min-naħa tiegħu, il-Ministru għall-Fondi Ewropej u l-Implimentazzjoni tal-Programm Elettorali Stefan Zrinzo Azzopardi sostna li għal darb’oħra l-Gvern wera l-impenn tiegħu li jwettaq il-programm elettorali. “Kull sena jingħata rendikont tal-miżuri li jkunu twettqu matul dawk it-tnax-il xahar, filwaqt li ġie assigurat li jkun hemm ministru responsabbli minn dan il-proċess bħala parti mill-ħidma tal-Gvern fit-twettiq tal-programm elettorali. Ir-riżultati li qed jitħabbru llum ikomplu jikkonfermaw li dak li jitwiegħed mhux biss ikun imfassal u maħsub, imma anke sostnut minn pjan sħiħ sabiex il-wegħdi jitwettqu għall-ġid tal-poplu Malti u Għawdxi,” tenna l-Ministru Zrinzo Azzopardi.