Month: May 2023

Il-Prim Ministru Robert Abela laqa’ fil-Berġa ta’ Kastilja studenti tal-ħames u tas-sitt sena tal-Iskola Primarja Dun Salv Vella, tan-Nadur, Għawdex.

Din iż-żjara ntalbet mill-istudenti nfushom meta ftit tal-ġimgħat ilu l-prim ministru għamel żjara fuq ix-xogħlijiet estensivi li qed isiru fl-iskola tal-lokalità tagħhom.

L-istudenti mhux biss kellhom l-opportunità li jduru u jifhmu aktar dwar l-istorja tal-Berġa ta’ Kastilja u l-użu tagħha llum bħala l-Uffiċċju tal-Prim Ministru, iżda ddiskutew ukoll mal-Prim Ministru Robert Abela numru ta’ suġġetti li huma l-iżjed ta’ interess għalihom. Kellhom ukoll l-opportunità li jagħmlu l-mistoqsijiet tagħhom.

Il-gvern qed iwieżen u jgħin lil dawk il-persuni bi sfidi f’ħajjithom biex igawdu minn kwalità ta’ ħajja aħjar.
​

Fosthom, bl-investiment li l-gvern għamel biex illum ġiet inawgurata Dar Bjorn f’Ħaż-Żebbuġ, li se tkun qed toffri servizzi ta’ terapija lil persuni b’ALS u kundizzjonijiet newroloġiċi oħra.

Bil-gvern fl-isfond tal-kisbiet soċjali, qed jibqa’ ffukat fuq ħidma soċjali oħra li tindirizza r-realtajiet li jinbidlu maż-żminijiet, biex jibqa’ jsaħħaħ dak li jkun wettaq.

Fid-diskors tal-inawgurazzjoni, il-Prim Ministru Robert Abela tenna li huwa għalhekk li l-gvern fost oħrajn qed ikompli jżid il-Carer’s Grant u jinvesti aktar minn €4 miljun favur assistenti personali, biex aktar persuni jkunu jistgħu jgħixu b’mod indipendenti fil-komunità.

Huwa rrefera għall-ftehimiet soċjali b’mudell ta’ sħubija bejn il-gvern u s-soċjetà bħala wieħed b’saħħtu fejn dawk mis-settur privat jersqu ’l quddiem bl-aqwa prattiċi favur il-kura u l-ħarsien tan-nies.

Eżempju ċar ta’ dan huwa l-ftehim soċjali li l-gvern għamel ma’ ALS Malta, b’din id-dar tkun ta’ servizz kbir għas-soċjetà. Bi 30 persuna li ġew assessjati minn Aġenzija Sapport issa se jirċievu s-servizzi minn Dar Bjorn. Din id-dar maħsuba biex dawn il-persuni, li se jqattgħu ħinijiet twal fiha, igawdu mill-elementi ta’ barra. Fost oħrajn, id-dar tassigura li jidħol id-dawl naturali u tinkludi ġnien flimkien ma’ pixxina għat-terapija.

Il-Prim Ministru Abela kkonkluda b’ringrazzjament lill-professjonisti u lill-ħaddiema għall-kontribut siewi li jagħmlu fil-ħajja ta’ dawn il-persuni, biex ħajjithom tkun aktar komda u faċli f’dar mgħammra b’faċilitajiet tal-ogħla livell. Proġetti bħal dawn se jibqgħu jsibu s-sostenn tal-gvern.

F’laqgħa fil-Berġa ta’ Kastilja, li l-Prim Ministru Robert Abela kellu mal-Kummissarju Ewropew għall-Politika tal-Viċinat u t-Tkabbir Olivér Várhelyi, sostna li jilqa’ b’mod pożittiv id-djalogu miftuħ li qed ikollha l-Kummissjoni Ewropea mal-istati membri.

Matul din il-laqgħa kienu diskussi fost oħrajn il-viċinat tan-Nofsinhar tal-Ewropa u l-isfidi li dan ir-reġjun qed jiffaċċja minn żmien għall-ieħor. Il-Prim Ministru tenna li huwa fl-interess tal-Unjoni Ewropea li r-reġjun tal-Mediterran ikun wieħed stabbli.