Month: May 2023

F’laqgħa ma’ membri tal-eżekuttiv tal-Kunsill Nazzjonali taż-Żgħażagħ (KNŻ), il-Prim Ministru Robert Abela saħaq li jħares ‘il quddiem biex ikompli jiżdied l-attiviżmu taż-żgħażagħ fil-politika biex inġibu aktar bidliet f’pajjiżna. Fil-laqgħa fil-Berġa ta’ Kastilja, il-Prim Ministru nnota kif iż-żgħażagħ mhux biss huma katalisti għall-bidla iżda bil-vuċi tagħhom jistgħu jisfidaw l-istatus quo, jinfluwenzaw bl-ideat tagħhom, u flimkien inkomplu nimbuttaw riformi li jagħmlu differenza tanġibbli f’ħajjet in-nies.

Il-Prim Ministru Robert Abela saħaq li l-Gvern jemmen li ż-żgħażagħ għandhom jibqgħu jkunu fil-qalba tad-deċiżjonijiet. Dan saħqu f’kuntest tat-twaqqif tal-Youth Advisory Forum (YAF) imħabbar f’laqgħa ta’ Kabinett maż-żgħażagħ u li għada se jkunu qed jagħlqu l-applikazzjonijiet għal dawk bejn is-16 u l-35 sena li jixtiequ jkunu parti mill-YAF. Dr Abela rrimarka li dan il-forum se jitlob impenn u se jkun strument importanti ta’ konsultazzjoni maż-żgħażagħ fuq temi nazzjonali.

Min-naħa tagħha, il-President tal-KNŻ Mariah Zammit laqgħet it-twaqqif tal-YAF u l-fatt li l-KNŻ se jkollu rappreżentant fost id-disa’ membri tal-forum u anki se jkun parti mill-bord tal-għażla biex tmien żgħażagħ oħra jservu għal terminu ta’ 18-il xahar fil-YAF. Qalet li l-YAF se jkun opportunità tajba biex bħala Kunsill iwassal l-opinjonijiet taż-żgħażagħ fuq bosta suġġetti. Sostniet li dan se jsir ukoll fil-Parlament Nazzjonali taż-Żgħażagħ. Zammit spjegat ukoll kif il-KNŻ jirrappreżenta firxa wiesgħa ta’ żgħażagħ, mhux biss studenti iżda anki ħaddiema. Laqgħet ukoll il-ħtieġa li l-attiviżmu taż-żgħażagħ ikompli jissaħħaħ, u ppreżentat lill-Prim Ministru l-pjan ta’ ħidma tal-KNŻ għat-tnax-il xahar li ġejjin.

Preżenti għal-laqgħa kien hemm ukoll il-Ministru Clifton Grima, is-Segretarji Parlamentari Andy Ellul, Keith Azzopardi Tanti u Rebecca Buttigieg, id-Deputat tal-Gvern Naomi Cachia u l-Kap tas-Segretarjat tal-Uffiċċju tal-Prim Ministru Glenn Micallef.​

“Il-bidliet li qed inkomplu nġibu f’pajjiżna rridu nagħmluhom ukoll biex nibqgħu ngħollu l-livell tal-prodott turistiku.” Dan kien il-messaġġ ewlieni li għadda l-Prim Ministru Robert Abela meta żar investiment ta’ €25 miljun f’lukanda ġdida f’San Ġiljan. Fil-fatt saħaq li rridu nibqgħu nħarsu lejn tkabbir li jkun sostenibbli b’viżjoni ċara għas-settur turistiku biex ikunu attirati lejn Malta turisti ta’ kwalità f’ambjent isbaħ u nadif f’pajjiżna.

Fiż-żjara fil-lukanda AC Hotel by Marriott, li bdiet tilqa’ l-ewwel turisti, il-Prim Ministru Robert Abela tenna li l-Gvern se jibqa’ jagħti l-appoġġ li jġib ċertezza u stabbiltà anki fost dawk li qed jinvestu f’pajjiżna. Dan anki permezz tal-għajnuna kbira li qed tingħata fuq l-enerġija. Huwa faħħar dan l-aħħar investiment fis-settur tal-ospitalità u rrimarka kif issa pajjiżna qed iħares lejn riżultati fit-turiżmu li jlaħħqu dawk ta’ qabel il-pandemija. Dan qalu f’kuntest li statistika uffiċjali wriet li l-ewwel kwart ta’ din is-sena kien l-aqwa wieħed fl-istorja għas-settur turistiku f’Malta. Il-Prim Ministru Robert Abela spjega kif il-ħidma li tindirizza l-isfida tal-istaġjonalità fit-turiżmu trid tkompli u tibqa’ tissaħħaħ biex l-andament pożittiv tat-turiżmu jibqa’ jinħass f’oqsma oħra f’Malta.

Fil-lukanda ta’ 106 kmamar u b’faċilitajiet mill-aqwa, fosthom pixxina fuq ġewwa u fuq barra, il-Prim Ministru, akkumpanjat minn martu Dr Lydia Abela, faħħar ir-reżiljenza u r-rieda qawwija tal-investituri u nnota l-fiduċja li qed ikomplu juru f’pajjiżna. Qal li ma nistgħux nieqfu hawn u huwa għalhekk li l-Gvern se jibqa’ jinċentiva l-investiment anki fit-turiżmu. Hawn innota r-reviżjoni ‘l fuq li għamlet il-Kummissjoni Ewropea riċentament għat-tkabbir ekonomiku ta’ Malta u rrimarka kif l-istess istituzzjoni Ewropea saħqet li Malta għandha u se jibqa’ jkollha l-inqas rata ta’ qgħad.

Albert Galea, il-Kap Eżekuttiv tal-Grupp Baystreet, il-Grupp li jmexxi wkoll din il-lukanda, faħħar ħidmet il-ħaddiema li ħadmu fuq dan l-investiment tal-lukanda. Qal li huwa kburi bil-fatt li l-linja tal-lukandi msemmija, imferxa f’madwar 31 pajjiż, għandha preżenza wkoll f’Malta. Preżenti wkoll kien hemm il-Ministru għat-Turiżmu Clayton Bartolo.​

80,000 metru kwadru ta’ art għat-tgawdija tan-nies​​

Il-komunitajiet se jgawdu minn spazji miftuħa ħodor b’sittax-il proġett f’lokalitajiet madwar Malta u Għawdex, proġetti li se jagħtu nifs ġdid lill-komunità, b’110,000 persuna se jkollhom dawn l-ispazji ftit minuti bogħod mid-dar, fejn jistudjaw jew fejn jaħdmu.

Dan tħabbar mill-Prim Ministru Robert Abela f’konferenza tal-aħbarijiet fil-Mosta, li matula tħabbru numru ta’ proġetti, kif proposti minn kunsilli lokali u entitajiet mhux governattivi, li se jkunu qegħdin isiru u jitlestew minn Project Green sal-2025 b’investiment ta’ €10 miljun.

Il-Prim Ministru spjega li l-Gvern qed jinvesti f’tmenin elf metru kwadru ta’ art biex jitgawdew bħala spazji miftuħa ġodda, jew spazji f’kundizzjoni ferm aħjar milli huma llum.

Fid-diskors tiegħu tenna li fost dawn il-proġetti hemm artijiet li setgħu nbnew, ġonna mitluqa, spazji bejn bini residenzjali, u artijiet barra mill-konfini tal-iżvilupp mitluqa; li b’dawn il-proġetti lkoll se jinbidlu f’postijiet fejn it-tfal jistgħu jiġru u jilagħbu, il-ħaddiema jistrieħu fi tmiem il-ġimgħa u l-familji jiltaqgħu.

Bl-għażla dwar liema proġett il-Gvern għandu jinvesti permezz tal-Community Greening Grant, għamlitha l-komunità nnifisha.

Fil-fatt, dawn il-proġetti, li jinfirxu min-nofsinhar tal-pajjiż sa Għawdex, huma lkoll proposti diretti ta’ kunsilli lokali u għaqdiet mhux governattivi. Rappreżentanti eletti jew volontiera li jaħdmu ta’ kuljum fost il-komunitajiet.  

Il-Prim Ministru Robert Abela sostna li dawn huma proġetti tan-nies, għan-nies. Proġetti li wkoll jirriflettu l-qalb soċjali ta’ gvern li se jibqa’ jieħu d-deċiżjonijiet biex il-pajjiż jimxi ‘l quddiem, għax huwa biss pajjiż li jkun miexi ‘l quddiem li jkun jista’ jinvesti f’dawn it-tip ta’ proġetti li rrefera għalihom bħala biss il-bidu.

Il-Ministru għall-Ambjent, l-Enerġija u l-Intrapriża Miriam Dalli spjegat li dan l-investiment se jagħti lill-komunitajiet tagħna 16-il spazju miftuħ għat-tgawdija tar-residenti. Hija tenniet li l-community greening grant hija l-ikbar skema li qatt rajna f’pajjiżna għal proġetti ambjentali s’issa. Il-Ministru Dalli sostniet ukoll li dan l-investiment qed isir fl-isfond ta’ xogħol li għaddej fuq proġetti kbar, li minnhom diġa’ infetħu spazji miftuħa ġodda oħra. Ikkonkludiet li permezz ta’ Project Green biss, mill-bidu ta’ din is-sena sa issa, infetħu u ġew riġenerati aktar minn 32,000 metru kwadru. Il-Ministru Dalli qalet li qed tħares ‘il quddiem għal aktar proġetti sostenibbli u ta’ kwalità.

​

“Dan hu l-mument tagħkom u aħna lkoll bħala poplu Malti u Għawdxi kollu se nkunu warajkom”. Kien dan il-messaġġ t’appoġġ li għadda l-Prim Ministru Robert Abela fil-bitħa tal-Berġa ta’ Kastilja meta f’attività sabiħa laqa’ lill-kontinġent Malti għal-Logħob tal-Pajjiżi ż-Żgħar tal-Ewropa li se jsiru fil-jiem li ġejjin f’pajjiżna.

Quddiem l-atleti li se jikkompetu ma’ oħrajn minn tmien pajjiżi oħra fid-19-il edizzjoni u t-tielet waħda organizzata f’Malta, il-Prim Ministru Robert Abela fisser kif il-Gvern investa b’mod rekord f’dawn il-Logħob, mhux biss fil-faċilitajiet sportivi iżda anki fit-taħriġ tal-atleti għaliex tassew jemmen fl-isportivi.

Spjega kif pajjiżna jrid jikseb riżultati li jservu ta’ ispirazzjoni għat-tfal kollha li se jibqgħu jgawdu mill-infrastruttura sportiva li tlestiet għal dawn il-Logħob. Huwa għalhekk li l-Prim Ministru rrimarka li min-Nofsinhar tal-pajjiż sa Għawdex irid ikollna faċilitajiet sportivi tal-ogħla livell.

Il-Prim Ministru qal lill-atleti fil-11-il dixxiplina sportiva biex jiffukaw fuq dan l-avveniment sportiv internazzjonali organizzat f’pajjiżna iżda r-riżultati li ġejjin għandhom ikunu biss il-bażi biex l-atleti jħarsu lejn affarijiet akbar, fosthom l-Olimpjadi ta’ Pariġi fl-2024. Il-Prim Ministru appella lil kulħadd biex anki jattendi għall-kompetizzjonijiet f’dawn il-Logħob li se jsiru bejn id-29 ta’ Mejju u t-3 ta’ Ġunju 2023. “Il-poplu Malti u Għawdxi kollu se jappoġġjakom u se jkun moħħu fikom”, saħaq il-Prim Ministru Robert Abela f’messaġġ ta’ awguri għall-atleti li se jirrappreżentaw lil Malta.

Qabel il-Prim Ministru indirizzaw lill-atleti l-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni Clifton Grima u l-President tal-Kumitat Olimpiku Malti Julian Pace Bonello. Il-Ministru Grima spjega kif dawn il-Logħob mhux biss se jkomplu jpoġġuna fuq il-mappa dinjija tal-isport imma l-atleti għandhom l-opportunità jsarrfu t-taħriġ u l-investiment li sar fihom f’riżultati tajbin kemm fuq livell personali kif ukoll fuq livell internazzjonali. Min-naħa tiegħu, Pace Bonello rrikonoxxa l-għajnuna finanzjarja tal-Gvern biex illum għandna atleti ferm imħejjija u sostna li huwa fiduċjuż li pajjiżna se juri l-aqwa tiegħu, kemm fuq livell ta’ organizzazzjoni iżda anki fuq livell sportiv.

Wara l-indirizz tal-Prim Ministru, iċ-Chairperson tal-Kumitat Organizzattiv ta’ dawn il-Logħob Mark Cutajar preżenta fost oħrajn sett ta’ midalji ta’ dawn il-Logħob lill-Prim Ministru, u l-captain tal-kontinġent Malti, Eleonor Bezzina, ippreżentat lill-atleti Elaine Genovese u Matthew Galea Soler bħala ż-żewġ atleti li se jġorru l-bandiera Maltija waqt iċ-ċerimonja tal-ftuħ tal-Logħob tal-Pajjiżi ż-Żgħar.

F’Reykjavik, l-Iżlanda, il-Prim Ministru Robert Abela, flimkien mal-mexxejja tal-pajjiżi membri fil-Kunsill tal-Ewropa, indirizza d-dibattitu ġenerali matul ir-raba’ summit tal-Kunsill tal-Ewropa mit-twaqqif tiegħu 74 sena ilu. Id-diskors qiegħed jiġi ppubblikat. ​​