Month: May 2023

F’summit tal-Kunsill tal-Ewropa f’Reykjavik, l-Iżlanda, il-Prim Ministru Robert Abela ffirma l-Ftehim tal-Kunsill tal-Ewropa li jistabbilixxi r-Reġistru Internazzjonali tad-Danni, ikkawżati mill-aggressjoni fl-Ukrajna. Dan ir-reġistru se jservi bħala dokumentazzjoni ta’ evidenza li jkun jista’ jintuża fil-futur biex tiġi żgurata r-responsabbiltà finanzjarja ta’ min qed iwettaq l-aggressjoni fl-Ukrajna.

Dan il-ftehim isegwi r-riżoluzzjonijiet tal-Assemblea Ġenerali tan-Nazzjonijiet Magħquda kif ukoll tal-Assemblea Parlamentari tal-Kunsill tal-Ewropa, li rrikonoxxew il-ħtieġa li jiġi stabbilit mekkaniżmu internazzjonali għar-riparazzjoni ta’ danni minn atti internazzjonali illegali matul il-gwerra fl-Ukrajna.

L-inklużjoni ma tfissirx biss għarfien, iżda tfisser li b’mod tanġibbli kull persuna jkollha l-opportunitá li tuża l-abbiltajiet biex timraħ u tilħaq l-aspirazzjonijiet tagħha.

Kien dan il-messaġġ tal-Prim Ministru Robert Abela waqt żjara li għamel fl-iskola għal tfal bl-awtiżmu Hand-in-Hand fir-Rabat akkumpanjat minn martu Dr Lydia Abela.

Din l-iskola toffri programm ta’ terapija bbażat fuq Applied Behaviour Analysis (ABA) għal tfal bl-awtiżmu, li huwa mmirat biex dawn it-tfal ikollhom mhux biss ħiliet soċjali iżda ukoll ħiliet li bihom ikunu jistgħu jgħixu b’mod indipendenti. Bil-Gvern qiegħed jiffinanzja dan is-servizz speċjalizzat li qed toffri din l-iskola.

Il-Prim Ministru faħħar il-ħidma li qegħda titwettaq mit-tmexxija u l-ħaddiema ta’ din l-iskola li qegħda tinvesti b’dedikazzjoni fl-abbiltajiet tal-istudenti f’ambjent addattat. Minn proġett pilota ta’ suċċess, għal skola li fi kliem il-ġenituri qed tagħmel differenza fil-kwalitá tal-ħajja ta’ uliedhom.

Prinċipji li jemmen fihom dan il-Gvern u li qed jirrifletti f’ħidma fosthom bit-tisħiħ tal-carer’s grant u l-investiment f’assistenti personali biex dawn il-persuni jkunu jistgħu jgħixu fis-socjetá b’mod aktar indipendenti. Dan filwaqt li l-Gvern qed jintroduċi ukoll skemi u servizzi aktar speċifiċi fosthom l-iskema “Sensability” li toffri assistenza finanzjarja biex il-familji jkunu jistgħu jagħmlu sensory room f’darhom.

Miżuri mfassla mill-esperjenzi tal-familji li se jkomplu jsibu l-investiment u l-appoġġ mill-Gvern.

Fl-MFCC Ta’ Qali, fejn qed tittella’ l-ewwel edizzjoni tal-Public Service Expo, tlaqqa’ l-Kabinett li ddiskuta s-Servizz Pubbliku. Waqt il-laqgħa, il-Prim Ministru u l-Kabinett tal-Ministri semgħu mingħand diversi persuni, kemm studenti, imprendituri u uffiċjali pubbliċi, dwar l-esperjenza tagħhom relatata mas-servizz pubbliku, kif ukoll suġġerimenti ta’ kif jista’ jissaħħaħ dan is-servizz.

Il-Prim Ministru Robert Abela saħaq li s-Servizz Pubbliku se jkun protagonist tal-bidla lejn il-qalba diġitali u ambjentali biex pajjiżna jibqa’ miexi ‘l quddiem. Tenna li l-istess Servizz Pubbliku jrid jiffaċilita dawn il-bidliet għall-kumplament tas-soċjetà, filwaqt li jkompli jsaħħaħ is-servizz li jirċievi kull ċittadin.

Il-Prim Ministru semma li fil-bidla diġitali, fl-aħħar ħames snin, il-Gvern investa ħames mitt miljun ewro fid-diġitalizzazzjoni tas-servizzi pubbliċi. Dan wassal sabiex nibqgħu fil-quċċata tal-e-government fost il-pajjiżi kollha tal-Unjoni Ewropea. Semma kif id-diġitalizzazzjoni twassal biex jitjieb l-operat ta’ setturi kruċjali bħal dawk tas-saħħa u l-ġustizzja. Tkellem ukoll dwar l-Intelliġenza Artifiċjali (AI) li trid tkun fiċ-ċentru tal-bidliet kbar u kif l-Istrateġija Nazzjonali dwar l-AI għandha l-għan li tipprepara lil pajjiżna biex jadotta l-AI fil-proċessi u s-sistemi tiegħu.

F’dak li jirrigwarda riformi ambjentali, il-Prim Ministru Robert Abela saħaq li s-Servizz Pubbliku qed jibqa’ jkun fuq quddiem nett biex iwettaq il-bidliet neċessarji biex nilħqu l-miri stabbiliti. Hawnhekk semma l-qalba għal 250 vettura elettrika li jintużaw fl-amministrazzjoni pubblika. Semma wkoll it-trasformazzjoni li trid issir fil-binjiet pubbliċi, bħall-proġett li tlesta ta’ Project House fil-Floriana, biex ikunu aktar sostenibbli fl-użu tal-enerġija.

Il-Prim Ministru tkellem dwar is-servizz li jingħata lill-pubbliku li għandu jkun effiċjenti u ta’ kwalità. Semma kif numru ta’ dipartimenti diġà ġew rikonoxxuti għas-servizz ta’ eċċellenza li jagħtu lill-pubbliku, fejn ingħataw Quality Label. Hawnhekk enfasizza li kull dipartiment għandu jilħaq dan il-livell.

Il-Prim Ministru sema’ dak li kellhom xi jgħidu l-persuni li tkellmu waqt il-Kabinett u tenna li din kienet okkażjoni opportuna biex jisimgħu dak li kellhom xi jgħidu n-nies. “Ejja nieħdu dawn is-suġġerimenti u ntejbu s-sistemi tagħna. Ejja nibqgħu nisimgħu lill-klijent għaliex hekk biss nistgħu niddisinjaw u noffru servizz ta’ eċċellenza. Ejja nibqgħu viċin in-nies, għaliex hekk biss nistgħu nagħmlu d-differenza,” temm jgħid il-Prim Ministru Robert Abela.

Waqt il-laqgħa tkellem ukoll is-Segretarju Permanenti Ewlieni Tony Sultana. Fl-indirizz tiegħu qal li s-Servizz Pubbliku qed ikompli jħares ‘il quddiem u jintroduċi riformi moderni u innovattivi, li jevitaw xogħol amministrattiv żejjed u jżidu l-effiċjenza.

Is-Sur Sultana sostna li dawn ir-riformi jirrispettaw u jsaħħu l-kundizzjonijiet tal-ħaddiema, iżda wkoll jindirizzaw dejjem aktar il-bżonnijiet tal-pubbliku biex aktar servizzi jaslu għand aktar nies bl-aktar mod faċli. B’hekk bi sforz kollettiv, is-Servizz Pubbliku jkompli jimmodernizza ruħu u lil pajjiżna għal aktar riżultati pożittivi.

Qabel bdiet il-laqgħa tal-Kabinett, il-Prim Ministru Robert Abela żar il-Public Service Expo, li qed tiġbor fi ħdanha sistemi teknoloġiċi varji li jintużaw ta’ kuljum mis-Servizz Pubbliku. Din l-Expo innovattiva se tibqa’ miftuħa sa nhar il-Ġimgħa, 12 ta’ Mejju 2023.​

Studenti li qed jistudjaw fir-raba’ sena tal-kors tal-mediċina se jkollhom l-opportunità li jservu f’dak li huwa magħruf bħala l-isptar tal-Vatikan, l-Ospedale Pediatrico Bambino Gesù – wieħed mill-aqwa sptarijiet pedjatriċi. Dan bi ftehim li se jkun ffirmat fil-jiem li ġejjin, li qed ikompli jsaħħaħ ir-relazzjoni bilaterali bejn il-Gvern Malti u s-Santa Sede. 

Dan ġie rrimarkat mill-Prim Ministru Robert Abela f’laqgħa li kellu fil-Berġa ta’ Kastilja mas-Segretarju tal-Istat tal-Vatikan, il-Kardinal Pietro Parolin, li matula l-Prim Ministru ħabbar ukoll li l-Gvern Malti se jkun qed jagħti b’donazzjoni lill-klinika tal-fqar Ambulatorio Madre Della Misericordia imwaqqfa mill-Papa Franġisku, pneumatometer, li huwa apparat mediku speċjalizzat. 

Matul din il-laqgħa, ġiet diskussa ukoll ir-relazzjoni b’saħħitha bejn iż-żewġ stati, bil-Prim Ministru jirrimarka li t-tnejn iħaddnu valuri soċjali u jaħdmu favur il-ġustizzja soċjali. 

Fost oħrajn, il-Gvern Malti qed iwettaq ħidma kontinwa biex jindirizza sfidi ekonomiċi marbuta mal-inflazzjoni u l-prezzijiet tal-enerġija u tal-fjuwil, biex jipproteġi u joffri stabbiltá lill-familji u lin-negozji. Dan fi sfond tal-importanza li l-Gvern qiegħed jagħti l-istat soċjali taċ-ċittadini fosthom b’servizz tas-saħħa, servizz ta’ childcare, trasport pubbliku u edukazzjoni mingħajr ħlas. Il-Prim Ministru Robert Abela spjega ukoll li qed jittieħdu l-passi meħtieġa biex tiġi assigurata ekonomija sostenibbli, fosthom bit-tranżizzjoni diġitali u ħadra, dejjem bl-għan li tkompli titjib il-kwalitá tal-ħajja tal-familji. 

Il-gwerra fl-Ukrajna, is-sitwazzjoni fis-Sudan u fil-Libja u l-imigrazzjoni fil-mediterran kienu ukoll fuq l-aġenda. Il-Prim Ministru Robert Abela tenna li Malta dejjem taħdem favur il-paċi u bħala pajjiż membru tal-Kunsill tas-Sigurtà tan-Nazzjonijiet Magħquda nibqgħu kommessi li noffru appoġġ umanitarju.

Il-Prim Ministru kien akkumpanjat mill-Ministru għall-Wirt Nazzjonali, l-Arti u l-Kultura Owen Bonnici, l-Ambaxxatur ta’ Malta għall-Istat tal-Vatikan Frank Zammit u mill-Kap tas-Segretarjat tal-Uffiċċju tal-Prim Ministru Glenn Micallef.​

F’laqgħa mat-tmexxija l-ġdida tal-Kamra tal-Kummerċ, il-Prim Ministru Robert Abela saħaq li l-Gvern se jkompli jimbotta ‘l quddiem bidliet li jibqgħu jwasslu għal tkabbir ekonomiku sostenibbli. Fil-Berġa ta’ Kastilja, il-Prim Ministru laqa’ fost oħrajn lill-President tal-Kamra tal-Kummerċ Chris Vassallo Cesareo u fil-laqgħa rrimarka kif bħala pajjiż irridu li l-ekonomija tagħna tkun waħda bbażata fuq il-ħiliet, ir-riċerka u l-innovazzjoni biex b’hekk mhux biss toħloq impjiegi iżda karrieri ta’ kwalità.

F’kuntest li l-maġġoranza tal-ażjendi f’pajjiżna jridu jħaddmu aktar nies, il-Prim Ministru Robert Abela sostna li l-edukazzjoni tibqa’ ċ-ċavetta għat-tisħiħ tas-settur tax-xogħol fejn b’ħidmietna nibqgħu niddirezzjonaw lill-istudenti u lill-ħaddiema ta’ għada lejn l-oqsma li joffrulhom karrieri u kwalità tal-ħajja. Il-Prim Ministru Robert Abela tkellem ukoll fuq prijoritajiet ġodda li għandu l-pajjiż u enfasizza fuq il-qalbiet diġitali u ambjentali.

Dr Abela spjega li anki l-ikbar pakkett ta’ fondi Ewropej miksub għal Malta ġie direzzjonat b’dawn il-qalbiet fi ħsiebna u dawn l-istess qalbiet mhux biss għandhom joħolqu setturi ġodda f’pajjiżna imma jittrasformaw ukoll l-operat tan-negozji. Spjega li l-qalba ambjentali għandha tmiss ma’ bosta setturi, mit-trasport, għall-bini u l-enerġija. Fisser ukoll li l-bidla teknoloġika li rridu nwettqu bħala pajjiż f’qasir żmien hija waħda bla preċedent fl-istorja għaliex nifhmu li din importanti. Hawn semma l-investiment mill-Gvern favur id-diġitalizazzjoni tas-servizzi iżda wkoll fisser kif il-qalba diġitali tista’ tkun ukoll ta’ vantaġġ għas-settur privat.

Il-Prim Ministru Robert Abela rrijafferma l-impenn tal-Gvern li jibqa’ jimbotta riformi b’kuntatt kontinwu mal-imsieħba soċjali u filwaqt li awgura lit-tmexxija l-ġdida tal-Kamra tal-Kummerċ, fisser din il-Kamra bħala sieħeb strateġiku ewlieni fid-diskussjonijiet favur teħid deċiżjonijiet li bihom Malta tkompli miexja ‘l quddiem.

Min-naħa tiegħu l-President tal-Kamra tal-Kummerċ, Intrapriża u Industrija, Chris Vassallo Cesareo laqa’ l-laqgħa li kellu mal-Prim Ministru u sostna li l-Kamra tal-Kummerċ tħares ‘l quddiem lejn djalogu kontinwu. Innota kif il-Gvern kien għaqli u ħadem tajjeb biex ipproteġa l-ekonomija billi refa’ hu l-piż marbut maż-żieda fil-prezzijiet internazzjonali tal-enerġija. Huwa rrimarka li l-komunità kummerċjali tibqa’ tistenna d-direzzjoni mill-Gvern dwar is-sussidju fuq l-enerġija. Il-President tal-Kummerċ semma wkoll l-importanza tal-governanza fosthom fejn jidħol il-proċess ta’ għoti tal-kuntratti u rrefera wkoll għall-ħtieġa ta’ riforma fil-qasam tal-ġustizzja.

Għal-laqgħa f’Kastilja attendew ukoll il-Ministri Miriam Dalli u Silvio Schembri kif ukoll il-Kap tas-Segretarjat tal-Uffiċċju tal-Prim Ministru Glenn Micallef.