Month: January 2026

Fil-Berġa ta’ Kastilja, il-Prim Ministru Robert Abela laqa’ lil Aidan Cassar, ir-rappreżentant ta’ Malta għall-Eurovision Song Contest li se jsir f’Mejju ġej, f’Vjenna, l-Awstrija. 

Il-Prim Ministru Robert Abela feraħ lil Aidan Cassar għall-prestazzjoni tiegħu u awguralu kull suċċess kemm għall-Eurovision Song Contest kif ukoll għall-futur.

Dr Abela rrimarka fuq il-livell dejjem jogħla ta’ talent Malti u sostna li l-Gvern jibqa’ kommess li jkompli jinvesti fit-talent artistiku lokali u li jkompli jappoġġja festivals li joffru lill-artisti Maltin pjattaforma anki internazzjonali sabiex juru t-talent tagħhom.

Flimkien ma’ Aidan Cassar kien hemm iċ-Chairperson u l-Kap Eżekuttiv tal-Public Broadcasting Services Anna Bonett u Keith Chetcuti rispettivament.

Il-Prim Ministru Robert Abela jindirizza lill-Konsli Onorarji ta’ Malta waqt l-iskambju ta’ awguri fil-bidu tas-sena l-ġdida. Id-diskors qed ikun ippubblikat.

Waqt l-inawgurazzjoni tal-ftuħ uffiċjali tat-tielet u l-aħħar fażi tal-Kumpless Sportiv fil-Marsa, il-Prim Ministru Robert Abela saħaq kif dan il-Kumpless jikkonferma l-investiment kontinwu tal-Gvern fl-isport, fl-atleti u fil-futur tagħhom.

Il-Kumpless Sportiv tal-Marsa jikkonsisti fi tliet fażijiet distinti, li jinkludu l-kumpless sportiv għall-ġinnastika u sport ieħor, il-proġett ta’ riġenerazzjoni tal-binja storika tal-1903, kif ukoll din l-aħħar fażi taċ-ċentru dedikat għall-Weightlifting, Squash, Netball u fitness. B’kollox, l-investiment fuq dawn it-tliet fażijiet jaqbeż is-€16-il miljun.

Dan il-kumpless sportiv jikkonsisti fi tlett sulari ta’ faċilitajiet sportivi u anċillari u joffri faċilitajiet sportivi tal-ogħla livell, kif jixraq fiż-żminijiet tal-llum. Fl-aħħar fażi tlesta investiment f’courts ġodda għall-isport tal-Isquash u tan-Netball, ċentru dedikat għall-Weightlifting, kif ukoll fitness centre ta’ livell għoli, imwettaq permezz ta’ sħubija mal-privat.

Il-Prim Ministru Robert Abela nnota kif permezz ta’ dawn il-faċilitajiet, il-komunitajiet sportivi issa jistgħu jgawdu ambjent modern, professjonali u aċċessibbli, li jsaħħaħ it-taħriġ, il-kompetizzjoni u l-iżvilupp tal-atleti f’kull stadju tal-karriera tagħhom.

Huwa semma li investiment sportiv bħal dan se jkompli jqiegħed lil Malta fuq il-mappa dinjija tal-kompetizzjonijiet internazzjonali. Is-sena d-dieħla, Malta se tkun qed tilqa’ l-Youth Commonwealth Games, b’parteċipazzjoni ta’ 74 pajjiż differenti. Avveniment ta’ din il-portata li wasal ukoll f’pajjiżna grazzi għal dawn l-investimenti li qed inwettqu u li se jkompli jeleva l-istandards sportivi f’pajjiżna u jpoġġi lil Malta fuq il-mappa sportiva dinjija. “Dan se jkun l-akbar avveniment sportiv,” saħaq il-Prim Ministru hu u jinnota li l-faċilitajiet inawgurati se jintużaw f’dawn il-Logħob.

Dr Abela nnota kif l-investiment fil-qasam sportiv huwa parti minn viżjoni usa’, li biha l-Gvern qed ikompli jpoġġi l-isport bħala pilastru ewlieni tas-soċjetà billi jippromwovi saħħa aħjar, dixxiplina, ħidma f’tim u sens qawwi ta’ komunità. Huwa rrimarka li permezz ta’ SportMalta, il-Gvern qed jaħdem b’mod strateġiku biex joħloq infrastruttura li twieġeb għall-ħtiġijiet tal-lum kif ukoll dawk tal-ġejjieni.

Matul id-diskors tiegħu, il-Prim Ministru Abela għamel ukoll referenza għall-investiment li sar fil-Padiljun Sportiv u Akwatiku fir-Rabat, Għawdex, fost investimenti oħra li waslu bis-saħħa wkoll ta’ ekonomija b’saħħitha li qed twassalna biex issa nniedu l-Viżjoni Malta 2050 biex Malta titla’ l-livell li jmiss. Fil-Marsa semma wkoll il-pjanijiet tal-Gvern biex jirriġenera l-Marsa u l-inħawi tal-Port il-Kbir f’aktar investiment ta’ kwalità li se jimbotta ’l quddiem il-Gvern. 

Fil-messaġġ tiegħu l-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni Clifton Grima tkellem dwar is-snin ta’ ħidma fis-settur importanti tal-isport f’pajjiżna. Huwa qal li matul is-snin riċenti kien hemm u se jkompli jkun hemm investiment kbir li permezz tiegħu pajjiżna qed jagħmel qabża ta’ kwalità fis-settur. Ħidma mhux biss fit-twettiq ta’ proġetti infrastrutturali, imma wkoll fl-għajnuna li qed tingħata lill-assoċjazzjonijiet, għaqdiet u klabbs sportivi, anke fl-għajnuna finanzjarja diretta lill-atleti u l-isportivi. “L-infrastruttura ġdida u l-faċilitajiet mtejba qed jagħtu opportunitajiet aħjar għall-atleti li jħejju għal-logħobkompetittiv u għall-formazzjoni sportiva tagħhom. Din il-ħidma qed twassal biex pajjiżna qed dejjem aktar isir ċentru fejn nilqgħu avvenimenti sportivi ta’ kalibru internazzjonali, apparti li qed nagħtu faċilitajiet mill-aqwa lill-atleti u sportivi u lill-poplu kollu”, qal il-Ministru Grima.

Il-Kap Eżekuttiv ta’ SportMalta Mark Cutajar saħaq kif SportMalta biddlet il-faċilitajiet sportivi tal-Marsa, li qabel kienu fi stat ħażin, f’kumplessi sportivi ta’ livell għoli li jaqdu lill-assoċjazzjonijiet, lill-klabbs, jospitaw avvenimenti internazzjonali, kif ukoll l-isport u l-attività fiżika għall-komunità inġenerali.

Matul iċ-ċerimonja saret ukoll diskussjoni bejn tliet atleti li jirrappreżentaw dixxiplini differenti, fejn l-atleti qasmu l-esperjenza tagħhom dwar l-importanza ta’ faċilitajiet moderni, il-preparazzjoni għall-kompetizzjoni u r-rwol tal-isport fil-ħajja taż-żgħażagħ. Fid-diskussjoni ħadu sehem atleti mill-isport tal-iSquash, in-Netball u l-Weightlifting, li enfasizzaw kif dawn l-investimenti qed jagħtu opportunitajiet ġodda lill-atleti Maltin biex jikkompetu b’suċċess fuq livell internazzjonali.

Prime Minister Robert Abela addresses the Diplomatic Corps during exchanges of New Year Greetings. The speech is being published.

F’laqgħa mal-Kunsill Nazzjonali taż-Żgħażagħ li matulha ġie ppreżentat ir-rapport ta’ ħidma tal-Parlament Nazzjonali taż-Żgħażagħ 2025, il-Prim Ministru Robert Abela tkellem dwar l-importanza tal-intelliġenza artifiċjali u l-użu responsabbli tagħha. Huwa ħabbar li l-Gvern qed janalizza l-liġijiet eżistenti u jipprepara rakkomandazzjonijiet kontra l-użu tad-deepfake biex jikkawża fastidju, rikatt jew bullying.

“Hekk kif għamilna fil-każ tas-cyberbullying u cyberstalking, se naħdmu wkoll biex l-użu tad-deepfake biex ikisser lin-nies jiġi penalizzat kif jixraq fil-liġijiet ta’ pajjiżna,” qal Dr Abela. Huwa spjega li waqt li bdiet l-implimentazzjoni tal-miżuri tal-Budget relatati mal-promozzjoni tal-użu tal-intelliġenza artifiċjali, il-Gvern se jkun qed jaħdem ukoll biex iċ-ċittadini jużaw dawn l-għodod diġitali f’ambjent sigur għal kulħadd.

L-użu tal-intelliġenza artifiċjali u l-parteċipazzjoni taż-żgħażagħ fil-ħajja pubbliku kienu ż-żewġ temi ewlenin li indirizza l-Parlament taż-Żgħażagħ fl-2025. Waqt li kien qed jiddiskuti il-proposti taż-żgħażagħ, il-Prim Ministru spjega li ż-żgħażagħ qed jgħinu fit-tfassil ta’ Viżjoni Malta 2050 u se jkunu huma l-muturi ewlenin fl-implimentazzjoni tagħha.

“Din hija viżjoni li tipprepara lill-pajjiż għall-ħamsa u għoxrin sena li ġejjin u allura tolqot direttament lil dawk li bħalissa qed jippreparaw ruħhom għad-dinja tax-xogħol jew biex jibnu familja. Iż-żgħażagħ huma katalisti biex jifformaw il-politika tal-pajjiż fuq suġġetti importanti, fosthom ir-rata tal-fertilità, l-ambjent u l-bilanċ bejn il-familja u x-xogħol,” sostna l-Prim Ministru.

Preżenti għal-laqgħa kien hemm ukoll il-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni Clifton Grima, is-Segretarji Parlamentari Andy Ellul u Keith Azzopardi Tanti, is-Segretarju tal-Kabinett Ryan Spagnol u l-membri tal-Youth Advisory Forum.