Month: April 2026

Nhar il-Ġimgħa se jitlaqqa’ l-MCESD biex l-imsieħba soċjali u l-korpi kostitwiti jingħataw spjegazzjoni diretta dwar il-pjan preparatorju li pajjiżna għandu biex jilqa’ għal kull sfida

Appoġġ finanzjarju lill-familji fil-kontijiet tal-enerġija, hedging agreements ma’ banek internazzjonali u pjanijiet ta’ ħażna huma fost in-numru ta’ miżuri li qed jittieħdu mill-entitajiet tal-enerġija Maltin sabiex pajjiżna jkompli jiggarantixxi sigurtà fil-provvista u stabbiltà fil-prezzijiet tal-enerġija għall-familji u n-negozji.

Dan ħareġ minn laqgħa fil-binja tal-Power Station f’Delimara li l-Prim Ministru Robert Abela, akkumpanjat mill-Ministru għall-Ambjent, l-Enerġija u l-Indafa Pubblika Miriam Dalli, kellu ma’ rappreżentanti mill-Enemalta, Interconnect Malta, l-IESC u l-Enemed.

Il-laqgħa teknika saret fi sfond tas-sitwazzjoni internazzjonali fil-qasam tal-enerġija, x’miżuri qed jieħdu l-pajjiż sabiex inkomplu niggarantixxu stabbiltà u l-pajjiż jilqa’ għal xokkijiet esterni.

It-tekniċi mill-entitajiet rispettivi spjegaw kif pajjiżna għandu pjan ċar, filwaqt li jħares ukoll lejn strateġija fit-tul mibnija fuq il-prinċipji tal-istabbiltà fil-prezzijiet u ċertezza fil-provvista.

Il-Prim Ministru Robert Abela sostna li f’ċirkostanzi internazzjonali diffiċli u imprevedibbli, fejn pajjiżi oħra qed jiffaċċjaw nuqqas ta’ provvista u inflazzjonijiet qawwija fil-prezzijiet tal-enerġija, Malta rnexxielha żżomm il-prezzijiet stabbli grazzi għad-deċiżjonijiet li ttieħdu fil-ħin u għall-investimenti strateġiċi li saru.  Huwa enfasizza li l-Gvern se jibqa’ determinat li jkompli jipproteġi lill-familji u n-negozji permezz ta’ politika li jassiguraw sigurtà tal-enerġija u stabbiltà ekonomika.

Il-Prim Ministru żied li dan kollu huwa possibbli minħabba li pajjiżna żamm finanzi pubbliċi b’saħħithom, u  li issa, fi żminijiet bħal dawn, qed jippermettu li l-Gvern jibqa’ joffri garanzija ta’ stabbiltà fil-prezz tal-enerġija u ċertezza fil-provvista.

Mal-Ministru Dalli huwa ħabbar ukoll li, nhar il-Ġimgħa se jkun qed jitlaqqa’ l-Kunsill Malti għall-Iżvilupp Ekonomiku u Soċjali (l-MCESD), sabiex l-imsieħba soċjali u l-korpi kostitwiti jingħataw spjegazzjoni diretta dwar il-preparamenti u l-ħidma li qed issir biex pajjiżna jibqa’ preparat għal kull sfida.

Min-naħa tagħha, il-Ministru Miriam Dalli enfasizzat il-ħidma li għaddejja sabiex il-familji u n-negozji jkomplu jgawdu minn stabbiltà fil-prezzijiet u fil-provvista. “Żammejna l-kontijiet stabbli fi żmien il-pandemija, żammejna l-istabbiltà fil-prezzijiet u fil-provvista matul il-gwerra tal-Ukrajna fl-eqqel tal-kriżi tal-enerġija u llum qed nerġgħu niggarantixxu dak l-istess serħan il-moħħ. Qed nagħmlu hekk grazzi għall-għajnuna tal-Gvern u kif ukoll għall-ippjanar li jkun għaddej mal-Enemalta, Enemed, Interconnect Malta u IESC, fost oħrajn,” qalet il-Ministru Dalli.

Spjegat, kif f’dan il-mument ta’ taqlib internazzjonali bi pressjonijiet partikolari fuq is-settur tal-enerġija, il-Gvern Malti jibqa’ kommess sabiex jibqa’ ta’ spalla man-nies. Dan ifisser li meta l-Maltin illum qed iħallsu €1.34 għal kull litru ta’ petrol u €1.21 għal kull litru ta’ diesel, il-medja fiż-Żona Ewro hija ferm ogħla: €1.95 għal kull litru ta’ petrol u €2.16 għal kull litru ta’ diesel.

“Hemm żewġ raġunijiet primarji għalfejn qed jirnexxilna nagħmlu dan: bħala pajjiż Ewropew, konna l-ewwel Gvern li rnexxilna ninnegozjaw u nikkonvinċu lill-Kummissjoni Ewropea sabiex Malta tkun tista’ tilqa’ għall-impatt fl-għoli tal-prezzijiet fuq il-konsumaturi billi ndaħħlu s-sussidju. Fl-istess waqt, Malta hija l-uniku pajjiż Ewropew li għall-fjuwils tal-karozzi tuża s-sistema ta’ hedging. L-Enemalta wkoll tadotta sistema ta’ hedging u tassigura l-ħażna,” tenniet il-Ministru Dalli.

Preżenti għal din il-laqgħa kien hemm iċ-Chairman Eżekuttiv tal-Enemalta Ing. Ryan Fava, il-Kap Eżekuttiv ta’ Interconnect Malta l-Ing. Ismail D’Amato, iċ-Chairman Eżekuttiv tal-IESC l-Ing. Johann Zammit, iċ-Chairman Eżekuttiv tal-Enemed Kevin Chircop.

F’San Vinċenz de Paul, fejn se jitla’ l-bini ta’ sptar ġdid ta’ 300 sodda għall-kura intermedjarja, il-Prim Ministru Robert Abela ħabbar li se toħroġ tas-sejħa għall-iżvilupp ta’ dan l-isptar ġdid, li se jkun tal-ewwel f’pajjiżna fejn tidħol il-kura intermedjarja.

Il-Prim Ministru ddeskriva dan it-tender bħala l-ewwel pass f’viżjoni usa’ li se twassal biex intelqu aspett ġdid fil-kura tas-saħħa li pajjiżna qatt ma kellu qabel. Dr Abela rrimarka li fl-2024 kien inbeda proġett pilota b’16-il sodda li mbagħad ġie estiż għal 40 sodda permezz tar-rinnovazzjoni ta’ żewġ swali fil-kumpless Rużar Briffa f’San Vinċenz de Paul. Huwa saħaq li dan il-proġett pilota kien wieħed ta’ suċċess, b’riżultat t’hekk il-Gvern qed jimbarka fuq proġett ta’ biljun u tliet mitt miljun ewro.

Huwa qal li dan l-investiment huwa parti minn kullana ta’ investimenti li qed jitwettqu fis-settur tas-saħħa. “Illum bħala Gvern ninvestu fis-sena madwar €1.7 biljun fis-saħħa li minnhom terz ta’ biljun għall-kura tal-anzjani. Dan kollu b’mod komprensiv huwa ħames darbiet aktar minn dak li l-pajjiż kien jinvesti fl-2012 taħt amministrazzjoni preċedenti,” spjega Dr Abela.  

Il-Prim Ministru semma kif sal-ġimgħa l-oħra stess f’San Vinċenz ġiet introdotta MRI li tippermetti eżamijiet aktar kumplessi b’livell għoli ta’ preċiżjoni. Huwa nnota kif apparti mill-investiment infrastrutturali u teknoloġiku, il-Gvern kompla jinvesti bis-sħiħ fil-ħaddiema, fejn għamel  referenza għal-aqwa pakkett finanzjarju u kundizzjonijiet li qatt kellhom il-professjonisti fis-saħħa u l-kura tal-anzjani.

Dr Abela saħaq li s-settur privat huwa sieħeb strateġiku biex jitkompla jingħata livell għoli ta’ kura u ħarsien lill-anzjani. Huwa spjega li bħalissa hemm 20 ftehim mas-settur privat għax-xiri ta’ sodod biex tingħata l-aqwa kura possibbli, filwaqt li tlett idjar tal-Istat huma operati mill-privat. Il-Prim Ministru żied li dan kollu huwa investiment fl-anzjani li jista’ jibqa’ sostenibbli bis-saħħa ta’ ekonomija b’saħħitha, li tippermetti lill-Gvern jinvesti kemm fl-għajnuna fl-enerġija u ftehimiet aħjar għall-ħaddiema, kif ukoll f’setturi kruċjali bħalma huma s-saħħa u l-kura u l-ħarsien tal-anzjani.

Il-Ministru għas-Saħħa u l-Anzjanità Attiva Jo Etienne Abela tenna kif ftit aktar minn sentejn ilu l-Gvern esplora l-kunċett ġdid ta’ kura intermedja bil-ħsieb li noffru kura ffukata biex nevitaw deterjorament fil-kundizzjoni medika. “Illum qed nippreżentaw proġett ta’ 300 sodda li ħa jkun il-pont bejn kura fid-dar u kura fi sptar akut għall-anzjani f’Malta,” temm jgħid il-Ministru Jo Etienne Abela.

Min-naħa tiegħu, is-Segretarju Parlamentari għall-Anzjanità Attiva, Malcolm Paul Agius Galea spjega li l-Gvern għandu viżjoni ċara u ambizzjuża li tpoġġi lill-anzjani u l-bżonnijiet tagħhom fil-qalba tal-politika tiegħu, inkluż permezz tal-bini ta’ dan l-isptar ġdid kompletament iddedikat għalihom. Huwa qal li dan il-proġett qed jitfassal b’attenzjoni kbira u fuq standards ta’ sptarijiet moderni barra minn Malta. 

Is-Segretarju Parlamentari Agius Galea żied jgħid li diġà qed jiġu offruti servizzi ta’ kwalità f’San Vinċenz de Paul, bi swali ta’ kura intermedjarja u timijiet speċjalizzati li jgħinu lill-anzjani jirkupraw aktar malajr u jirritornaw għall-ħajja normali. Sostna li dan kollu qed jikkumplimenta l-bini ta’ dan l-isptar il-ġdid Sir Temi Zammit, fi ħdan San Vinċenz De Paul.

Il-Prim Ministru Robert Abela żar il-Gozo Cottage, impriża Għawdxija li tipproduċi prodotti tal-ikel u xorb ta’ kwalità għolja bbażati fuq it-tradizzjoni awtentika u standardsmoderni. 

Matul din iż-żjara l-Prim Ministru Abela ltaqa’ mhux biss mat-tmexxija imma wkoll mal-ħaddiema tal-kumpanija. Huwa ra mill-qrib il-ħidma li ssir biex jiġu prodotti ikel u xorbipproduċuti mill-istess kumpanija.  

Il-Gozo Cottage hija xhieda ċara ta’ kif riċetti mgħoddija minn ġenerazzjoni għal oħra u impenn kontinwu lejn l-eċċellenza jistgħu jinbidlu f’mudell ta’ intrapriża ta’ suċċesssostenibbli. 

Investiment ta’ €5 miljun f’faċilitajiet moderni kompla jsaħħaħ il-kapaċità ta’ din il-kumpanija li tħares il-wirt gastronomiku ta’ Għawdex filwaqt li taddatta ruħha għall-esiġenzi tal-lum.

Il-Prim Ministru faħħar l-impenn tal-kumpanija lejn is-sostenn tal-prodotti lokali, biex tinżamm il-kwalità u t-togħma naturali tal-prodotti. Dan l-approċċ mhux biss isaħħaħ l-awtentiċità tal-prodott, iżda jkompli jagħti valur lill-produtturi lokali.

Matul iż-żjara ġie enfasizzat kif Gozo Cottage qed tkompli tinvesti fir-riċerka, filwaqt li tikkollabora ma’ esperti internazzjonali biex tkompli ssaħħaħ il-kwalità tal-prodotti tagħha.

Il-Prim Ministru Robert Abela, akkumpanjat mill-Ministru għal Għawdex u l-Ippjanar Clint Camilleri, żar l-Assoċjazzjoni tal-Futbol Għawdxija (GFA) fix-Xewkija. Matul din iż-żjara l-Prim Ministru mhux biss iltaqa’ mal-membri tal-kumitat, imma kellu wkoll l-opportunità jitkellem mal-plejers tas-sezzjoni ta’ taħt l-14-il sena fil-grawnd tal-Gozo Football Stadium.

Waqt iż-żjara, il-Prim Ministru saħaq li l-isport għandu rwol kruċjali fl-iżvilupp tat-tfal u ż-żgħażagħ, mhux biss fuq livell kompetittiv, iżda wkoll għal fini ta’ dixxiplina, biex jitgħallmu jaħdmu f’tim, u fuq kollox għall-ġid fiżiku u mentali. Huwa rrimarka li l-pjan nazzjonali li qed jiddirezzjona lil pajjiżna sal-2050 – il-Viżjoni Malta 2050, jagħti prominenza lill-isport u l-attività fiżika u jagħti prijorità lill-kwalità ta’ ħajja aħjar għal kulħadd biex b’hekk ikollna komunitajiet aktar b’saħħithom u reżiljenti.

Il-Prim Ministru semma li l-Gvern jinsab impenjat li jkompli jsaħħaħ l-isport u l-infrastruttura sportiva, mhux biss f’Malta imma anke f’Għawdex. Huwa għamel referenza għall-investiment sostanzjali li sar fil-faċilitajiet sportivi f’Għawdex matul dawn l-aħħar snin biex jinħolqu aktar opportunitajiet għall-isportivi ta’ kull età u biex il-gżira Għawdxija tkun mgħammra b’infrastruttura sportiva ta’ livell għoli. Apparti l-appoġġ finanzjarju lill-assoċjazzjonijiet sportivi, ġie miftuħ il-Padiljun Sportiv u Akwatiku fir-Rabat, sar titjib fil-Korsa taż-Żwiemel f’Ta’ Xħajma u fis-Shooting Range ta’ Għajn Mellel, u b’kollaborazzjoni mal-Gozo Football Association, il-Gvern għen biex jissaħħu l-faċilitajiet tal-futbol f’Għawdex.

Iż-żjara tal-Prim Ministru Abela saret ġurnata qabel il-bidu tal-Gozo Weekender, hekk kif għat-tieni sena konsekuttiva Għawdex se jerġa’ jilqa’ logħbiet tal-Kampjonat Premier Malti fil-Gozo Stadium permezz ta’ kollaborazzjoni bejn il-Ministeru għall-Għawdex u l-Malta Premier League.

Imwaqqfa fl-1936 l-Assoċjazzjoni tal-Futbol f’Għawdex tmexxi kampjonati f’żewġ diviżjonijiet u diversi kompetizzjonijiet oħra, filwaqt li tgħin fl-iżvilupp ta’ plejers biex ikompli jsaħħaħ il-futbol Għawdxi.

Il-Prim Ministru Robert Abela, waqt żewġ avvenimenti separati ġewwa l-gżira Għawdxija, inawgura żewġ lukandi ġodda, ir-Reef Hotel & Spa fir-Rabat u l-lukanda Ben f’Marsalforn — żewġ lukandi li jirriflettu investiment privat li qed ikompli jsaħħaħ il-prodott turistiku f’Għawdex.

Matul dawn iż-żjarat, il-Prim Ministru, akkumpanjat mill-Ministru għal Għawdex u l-Ippjanar Clint Camilleri, seta’ jara mill-qrib kif dawn iż-żewġ lukandi qed jikkontribwixxu għal prodott turistiku ta’ kwalità, sostenibbli u ffukat fuq esperjenza awtentika għall-viżitaturi u t-turisti li jżuruhom.

Il-lukanda Ben Marsalforn hija affiljata mal-grupp Meliá. Din il-lukanda qed tkompli ssaħħaħ l-offerta turistika mhux biss f’din il-lokalità b’kunċett modern, li jgħaqqad flimkien il-kumdità, il-mistrieħ u l-aċċessibbiltà. 

Min-naħa l-oħra, ir-Reef Hotel & Spa, li tinsab fir-Rabat, Għawdex, hija lukanda b’madwar 110 t’ikmamar, faċilitajiet ta’ benesseri u spazji għall-avvenimenti.

Waqt dawn iż-żjarat separati, il-Prim Ministru sostna li Għawdex għandu rwol importanti fit-twettiq tal-Viżjoni Malta 2050, dan hekk kif il-gżira Għawdxija toffri karatteristiċi distintivi li dejjem aktar qed ifittxu t-turisti minħabba l-awtentiċità, il-kalma u l-karattru uniku bħala gżira ta’ villaġġi.

Dr Abela żied jgħid li l-Gvern se jkompli jinkoraġġixxi investiment turistiku sostenibbli li jkompli joħloq attività ekonomika matul is-sena kollha, jappoġġja n-negozji lokali u joffri dejjem aktar stabbiltà lill-ħaddiema fis-settur.